Xədicə Həsənli “Thessaloniki Europcup” turnirində ən güclü 8-liyə yüksəldi

17 yaşadək qız şpaqaçıların şəxsi yarışında Xədicə Həsənli ən güclü 8-liyə kimi irəliləməyi bacarıb.

Qrupda 3 qələbəsi olan Xədicə pley-offda keçirdiyi görüşlərdə Türkiyə, Ukrayna və İsraili təmsil edən rəqiblərinə qalib gələrək turnirin ən güclü 8 qız şpaqaçısı sırasına yüksəlməyi bacarıb. Xədicə bürünc medalın bir addımlığında ukraynalı Ustina Ohona 12:15 hesabı ilə uduzub.

Digər yeniyetmə qız şpaqaçılarımızan Aynur Quliyeva 32-liyə yüksəlmək uğrunda Bolqarıstan, Nəzrin Mehdiyeva isə 64-lüyə yüksəlmək uğrunda keçirilən görüşdə Yunanıstanı təmsil edən rəqibinə uduzub. Yeniyetmə şpaqaçılarımızdan Xatun Bayramova qrup mərhələsini adlaya bilməyib.

Yeniyetmə qız şpaqaçılarımız komanda yarışında Yunanıstanı təmsil edən kollektivə 39:38 hesabı ilə qalib gələrək ən güclü 8-liyə yüksəlib. Yarımfinala yüksəlmək uğrunda keçirilən görüşdə Ukraynanın 2-c komandasına 28:45 hesabı ilə uduzan şpaqaçılarımız 5-8-ci yerlər uğrunda keçirilən görüşlərdə Ukraynanın 4-cü (45:37) və İsralin ikinci komandasına (44:42) qalib gələrək turniri ilk 5-likdə bitirib.

Oğlan şpaqaçıların şəxsi yarışında qrup mərhələsini 4 qələbə ilə başa vuran Mirxətai Məmmədov ilk pley-off görüşündə yunan rəqibinə qalib gəlsə də, 32-liyə yüksəlmək uğrunda keçirilən görüşdə fransalı şpaqaçıya uduzub.